يلا نتعلم شيء جديد · رياضة · طعام صحي

٦ خطوات ضروري تعرفينها قبل الدخول في عالم الرشاقة = )

صورة ذات صلة

حابة تدخلين عالم الصحة واللياقة ؟

هذه التدوينة لك !

ملاحظة قبل ما تقرأين الموضوع : انا مش متخصصة باللياقة ولا مدربة رياضة ، انا هاوية و كل النصائح هنا كتبتها من خبرتي الشخصية عبر التعلم الذاتي = ) ، كل النصائح المكتوبه هنا مجربتها من سنوات وعملت فيها ومازلت اعمل فيها ومازلت اتعلم اشياء اكثر كل يوم والحمدلله النتائج ممتازة !

اولاً : ايش هي اسبابك ؟ 

عشان تضمنين استمرارية تحقيقك لأي هدف بالحياة لازم تعرفين ليه انتي تبين تحققين هذا الهدف ؟

ايش اللي يحركك ؟ اسألي نفسك على الورق لماذا ؟ بالبداية راح تكون اسبابك سطحيه ، مثلا ( ابي جسم جميل ، ابي مقاس اصغر ، ابي اشد الجسم ) لا توقفين عند هذه الاسباب ، اسألي ايضا لماذا ؟ ليه ابي جسم جميل ؟

وهنا راح تكتشفين القيم اللي تحركك ، مثلا قد تكونين تبحثين عن ثقة اعلا بالنفس ؟ او تحبين تكونين ايجابية اكثر وهكذا .. اكتشفي اسبابك ! هذه هي النقطة الاولى قبل الانطلاق .!

ثانياً : استمتعي بالرحلة ولا تستعجلين النتايج ! 

دايما اشوف بنات يتعبون اول ما يبدأون برحلة الرشاقة وبعد اول ١٠ ايام نلاقهم يطالعون المراية ويدعون ان الرياضة ماناسبتهم وماغيرتهم وما ساعدتهم على تحقيق اهدافهم ، ،هذا من وجهه نظري خطأ  !لأن الهدف من الرياضة من اساسا هو تحسين نمط الحياة ، نفسياً وبدنياً ، الرياضة اكثر من مجرد نشاط يغير الجسم ، الرياضة تحسن مزاجك ، ترفع مستوى طاقتك ، تغيرك من الداخل والخارج ايضاً ، الرياضة تضعك في مواجهه نفسك ،الرياضة تكسر منطقة الراحة عندك ،وتتحدى امكاناتك ، ووقتها راح يحدث تغيير في فكرك ، ماراح ترضى الا برفع سقف الامكانات ووقتها فقط راح تكتشفين قد ايش فيك طاقة مدفونه ! و ياسلام اذا كنا مرتبين اكلنا بعد ، بنلاحظ ان مستوى الطاقة يتضاعف ! احلا استثمار بالحياة ، الاستثمار بالصحة  : )

ثالثاً : وازني اكلك واحسبي حصصك صح !

ممكن تكون حسبة الكالوريز صعبه شوي للمبتدأين لذلك انصحك تمشين على مثل هالصورة ، اذا كنتي تواجهين صعوبة في حسبان سعراتك الحرارية ، تقدرين تقيسين اكلك بيدك .مقدار البروتين المطلوب بكل جبة هو بمقدار راحة اليد و النشويات بحجم قبضة اليد واما الدهون بهي بمقدار ربع الاصبع الصغير واما الخضار والفاكهه اكلي منها اللي تحبين بإعتدال خصوصاً الموز والمانجو و البطاطس . ويفضل ان الفاكهه تاكلي منها حبتين باليوم فقط كحد اقصى ، ايضاٍ يفضل انك تاكلي النشويات خلالالنهار وبعد الساعة ٦ المساء اكلي فقط البروتينات مع الخضار ( اذا حسيتي بالجوع فقط) .

نتيجة بحث الصور عن ‪count portions not calories‬‏

رابعا : النوم سر الرشاقة .

هذه قاعدة مفروغ منها ، اذا تضبط النوم يتضبط أيض الجسم وقدرته على حرق الدهون الزايدة اكثر ، مهما كان نظام اكلك ممتاز و رياضتك ممتازة وانتي ما تاخذين كفايتك من النوم فما راح تلقين النتيجة اللي تحبينها ، رتبي نومك واحرصي كل يوم انك تحصلين على كفايتك ، شخصيا اعترف اني ما اتقن هذه النقطة هذه الايام خصوصا مع البيبي عبودي ، نومي مقطع واصحى كل ساعتين او كل ٣ ساعات ، لكن احاول اعوض نومي بالليل بالنوم بعد ما ارجع من العمل .

خامساً : شرب الماء 

الجسم يعمل في وسط مائي ، الدم عبارة عن ماء و الدماغ ٧٠٪ ماء و العضلات ماء ، فكل ما رويتي جسمك بالماء كل ماصار اكثر قدرة على الحرق وصار اكثر قدرة على تزويدك بالطاقة العاليه الي تستحقينها . لذلك اشربي ماء ( حسب احتياجك وحسب نشاطك ) ، فمثلاً اذا كنتي تسوين رياضة وكنتي نشيطة بالغالب تحتاجين ماء اكثر من الي ما تسوي رياضة وهكذا .

سادساً : التمارين التمارين !

التمارين تزيد في قوتك و في لياقتك ، احرصي على تمارينك اليومية الي تناسبك ، فمثلا اذا كانت لياقتك كويسة وماعندك مشاكل صحية ف احرصي ان يكون عندك جدول تمارين من تنسيقك او تنسيق مدربة يكون شامل تمارين مقاومة وكارديو ٥ ايام بالاسبوع ، واما اذا كان عندك مشاكل صحية استشيري مدربة مختصة بالتمارين اللي تناسبك ، دائما فيه تمارين خاصة لكل شخص حسب حالته ، اهم. شيء الحركة !