يلا نتعلم شيء جديد · رياضة · طعام صحي

نظامي الغذائي و الرياضي

صورة ذات صلة

” الرياضة هي طريقتي في قول ” أنا أحبك ” لجسدي ” 

كلنا نبغى اجسام مثالية ، مقاسات اصغر ، اجسام منحوته مثل اللي نشوف صورهم بالسوشال ميديا .. ومع هذا الزخم المعلوماتي صرنا نقلل من شأن انفسنا لأننا مش مثلهم ، ثقتنا بأنفسنا اهتزت ، يمكن برضو اجبرنا انفسنا على اتباع نظام حمية قااسي ورياضة مكثفة ، اجبرنا نفسنا على نظام احنا نكرهه و ننفر منه والنتيجة ؟ ما فيه اي تقدم ملحوظ ! لأن الاساس او الدافع خطأ و بالنسبه لي وقعت في هذا الفخ من سنوات  وتعلمت منه اشياء كثير بكتبها لكم .

الدافع لاهتمامنا بأنفسنا لازم يكون الحب ، حبنا لأنفسنا ! ، بدون ما نقارن انفسنا بأحد وبدون تقليل من شأن انفسنا ، نهتم بأنفسنا لأننا نحبها ونحب نهتم بذواتنا و بصحتنا البدنية و النفسية ..

اذا كان الاساس صح فنقدر نضمن التقدم في تحقيق هذا الهدف واذا كان الاساس خطأ ، صعب جدا نتقدم وحتى اذا حققنا تقدم فراح يصير المحافظة على هذا التقدم صعب ! عشان كذا نشوف ناس كثير يبدأون بالرياضة و الاهتمام ومايقدرون يكملون ، لأنهم كارهين الرياضة و كارهين الاكل الصحي ويمكن برضو كارهين اجسامهم !

اذن قولي لنفسك انا اهتم بنفسي لأني احبها ، قولي لنفسك انا اعرف ان جسمي مش مثالي ومحد في هالدنيا مثالي وانا احب عدم مثاليتي وراح اابدأ اعكس هذا الحب بالاهتمام بنفسي وبأكلي .

 

هذه الفكرة السرية و السحرية اللي تخلي الناس تتعلق بالرياضة وتحبها بالرغم من التعب و الألم ، الفكرة هي : حب الذات و حب العناية فيها ، اذا وصلنا هالمرحلة بنبدع طرق بالعنايه بأنفسنا ، وهالشيء راح يزيد من سعادتنا وراحتنا !

 

في هذه المقال انا راح اذكر لكم نظامي الصحي ( المتوازن بدون حرمان ) وبرضو نظام رياضتي لكن قبل راح اتطرق لنقطة مهمة وهي ، كيف نحفز انفسنا لعمل الرياضة اليومية ؟

 

عشان نحفز انفسنا لازم نتمتع بخيال خصب وواسع = ) وخلونا نتخيل انفسنا ..

تخيلي نفسك وانتي منتهيه من التمرين ، تخيلي سعادتك ومدى رضاك عن ذاتك ، تخيلي جسمك المثالي ، تخيلي نفسك وانتي لابسه اجمل الفساتين بالمقاس اللي تحلمين فيه ..! كل اللي حققوا هذا الهدف بدأوا من هنا .. ورسموا طريقهم بقوة خيالهم ، نقدر نقول ان اينشتاين صادق لما قال ( الخيال أهم من المعرفة ) ، لأننا اذا تخيلنا ، راح نحب نتعلم ونطبق كل شيء وراح نحقق التقدم بإذن الله .

 

 

ايش نظامي الحالي ؟

نظامي الحالي من اجمل الانظمة اللي توصلت لها ، لكن قبل ما اقولكم ايش هو بقولكم نقطة مهمة و ضروري نعرفها ، وهي ان مافيه نظام صحي وغذائي يناسب كل الناس ! ما فيه ! لحد يقولي النظام النباتي ، او النظام الحيواني ( امزح ) ، او نظام الكيتو ، او نظام الكارب سايكلنق او او الهاي كارب ! ((جربتهم كلهم )) لحد ما توصلت لنظامي الحالي -النظام المرن السعيد – سميته سعيد لأني سعيدة جدا فيه = )

 

نظام المرونة بكل اختصار ينص على انك تحسبين عدد سعراتك خلال اليوم وطالما انتي قاعدة تاكلين بحدود هذه السعرات – تقدرين تاكلين اللي تبين – طالما انك تهتمين بأكلك ويكون معظمة ( ٧٠ ٪ ) صحي ( ما راح تكون نهاية الدنيا اذا اكلتي تشوكلت اليوم ، او طلبتي من المطعم بالمساء ) وحافظتي على تمارينك اليومية سواءا كانت مشي او غيره .

 

وفيه تطبيق ساعدني كثير في هذا الخصوص  اسمه my fitness pal ,  ساعدني كثير بهذه الحسبة وصارت جداً ممتعه ومثل اللعبه بالنسبه لي .

 

لذلك انصحك كثير تبدأين هذا النظام ، عبر البرنامج تقدرين تحسبين احتياجك وبيساعدك كثير توصلين لهدفك بإذن الله .

 

 

نظامي الرياضي :

أحب اسوي رياضتي بالمنزل ، لأني اقدر اتحكم بوقت التمرين خصوصا واني احب اسوي تماريني الصبح اول ما اصحى من النوم او الفجر قبل الدوام .

كنت و مازلت أعشق تمارين الكارديو عالية الشدة HIIT  اقدر اقول لقيت ضالتي فيها ، لعدة اسباب ، انها مختصرة بالوقت ( مدتها نصف ساعة او اقل ) واقدر من خلالها امرن كل عضلات الجسم و لي الحرية بإستخدام الاوزان او اعتمد على وزن جسمي فقط ..

طبعا النظام اللي ماشية عليه فيه برضو تمارين مقاومة و برضو احب اركض و اعمل تمارين الاطالة بعد التمرين وقبله .

والحمدلله لقيت المدربة المثاليه بالنسبه لي وصار لي معها تقريباً سنتين ونظامها جميل ومتدرج و تبني الجسم صح .. سعيدة بهذا النظام وعلى كثر ما اتكلم عنه ما اقدر اوفيه حقه !

المدربه اللي ماشية معها هي صاحبة تطبيق Gymnadz  انصح فيه بقوة حتى لو ماعندك اي خلفيه عن الرياضة هنا المكان المثالي لك للبدء ، بتتعلمين اشياء كثير وراح تحققي نتايج حلوووة مع الاستمرار معها ، انصحكم فيه .

 

 

واتمنى لكم حياة صحية وايجابية

و اتشرف بتواصلكم على مواقع التواصل الاجتماعي :

 

سناب deemzblog89

انستغرامDeemah_alotaibi

 

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

شعار وردبرس.كوم

أنت تعلق بإستخدام حساب WordPress.com. تسجيل خروج   /  تغيير )

Google photo

أنت تعلق بإستخدام حساب Google. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

Connecting to %s