كتب · يلا نتعلم شيء جديد · تطوير

درر من خبير العلاقات الزوجية د.جون غراي 

اهلا وسهلاً

كتاب د. جون غراي خبير العلاقات الزوجية و اللي كان بعنوان ( لماذا يتصادم المريخ والزهرة) يعتبر من اكثر الكتب مبيعاً بالعالم

صعب علينا كنساء تقبل المساعدة من اي شخص ، لكن نظرتنا هذي لازم تتغير ، لان عشان العلاقه تنجح بين الزوج وزوجته لازم وركزوو على لاازم 😁 انها تتراجع و تسمح له بالمساعدة حتى لو كانت بسيطه وتقدر هذي المساعدة 💗 التقدير سبب من الاسباب الي تجعل الزوج اكثر عطاءا
لازم علينا كنساء ان نكبح جماح ” العطاء اللا محدود لكل الناس” وبالمقابل نحرص على تلبيه احتياجاتنا ✨💗 لان حواء سبحان الله تستمتع بالعطاء لكن اذا كان هذا العطاء يستنزف صحتها وطاقتها فالامر ليس لصالحها وايضا يجب عليها تقبل مساعدة الاخرين لها يعني” لا تكابرون☺️”
كافئي نفسك، دلليها 👀💅💆💄 واحرصي ان مثل ما يكون فيه وقت للعطاء لازم يكون فيه وقت لمكافئه الذات و الحرص على راحتها واسترخائها💚 هالشيء راح يخلي زوجك يحترمك ويقدرك اكثر مما لما تكونين فانيه نفسك ” بالعطاء اللامحدود” 😉 معادله بسيطه تحدث فرق عظيم! 😇

يعني كل ما قضت المرأه وقت لنفسها يزيد شعور الرجل لإعطاؤها المزيد مما تحتاجه👍

مشاعر المرأة السلبيه مثل لما تركز في العلاقه على الاشياء اللي ناااقصتها 😶🚫 هالشيء يزيد من حدة ضغوط الرجل ،ليه؟ لان الرجل وقتها يشعر بالاخفاق و الاحباط وهذا الشيء يقلل من عطاء الرجل .

نصيغ الموضوع بطريقه اخرى؟

كلما بدت السعادة على المرأة يشعر الرجل بأنه ناجح ويصبح شعوره افضل وعطاؤه اكثر ✨

المنزل

استخداماتي لزيت اللافندر✨😍

من الزيوت المحببه الى قلبي ، زيت اللافندر ، له استخدامات كثيير كثييير للجسم وللمنزل 😍👌🏻..

طبعاً اللافندر مو بس زيت عطري عادي ، زيت اللافندر يحتوي على خصائص مضادة للبكتيريا يعني يعقم👌🏻💕🍃..

.من روائع اللافندر انه شم رائحته فقط يساعد الجسم على التخلص من السموم ، يعني يعمل ديتوكس للرئة 🙌🏼 .

و من استخداماتي المفضله للزيت هو لتعطير ارضيات البيت ، احب احط منه نقط مع منظف الارضيات المخفف بالماء ( استخدم بليدج بالبرتقال) ، ويااسلام على الريحة😍💕.

و بما اني ما استخدم داوني بتاتاً مع الملابس ، فـ استخدم زيت اللافندر بتعطير الملابس ، الطريقة: احط منه قطرات بالشطفة الاخيرة للملابس بالغسالة ، وبرضو احط منه قطرات ( ١٠ قطرات) ببخاخ مع ماء و ارشه على الملابس قبل الكوي وبرضو اعطر فيه الدواليب 👌🏻 من مميزاته انه ما يترك اثر زيتي ابدااً. .

🍃💕 وانتم ايش زيوتكم المفضله للبيت وللاستخدم الشخصي؟👀

رياضة

اساسيات الروتين الرياضي بالمنزل 💪🏼

ضروري  اننا نبدأ هذا الروتين وببالنا فكرة راسخه او قناعة اننا نسوي هالشيء لأجل انفسنا مو عشان الناس و مو بس عشان تكون اجسامنا جميلة !.. اذا كانت عندنا اسباب كافيه راح نقدر نحقق الي نبغاه بأي مجال نتمناه ، يعني اللي تسوي رياضه وهي اهدافها سطحيه ” عشان يسكر فستانها لان عندها حفله ” بتلاحظ انها بتترك الرياضه بمجرد انتهاء هالحفلة او المناسبه وبترجع مثل ما كانت.

. . لازم نسوي هالروتين لاننا نبغى صحة افضل ، ليه؟ لاننا نستحق ، لأننا نحب انفسنا كثير ونبغى لها الافضل👌.

. تذكرو لنفسك عليك حق! ..

شرب الماء قبل الرياضه بنص ساعه واثناء الرياضه ” بشكل بسيط” مهم .. وايضا بعد الرياضه ونحرص اننا نشرب باليوم الواحد لتر ونص الى لترين ماء✨.

البروتين ، البروووتين يا جماعه! 😁💪🏼

قبل الرياضه بساعه او ساعتين لازم تكونين ماكله وجبه مغذية ( بيض وسبانخ مع بروكلي او فطر ) وبعد الرياضه لازم تاكلين على طوول وغلط تجوعين نفسك ، ليه؟ بعد الرياضه لازم نعوض الجسم عشان يقدر يجدد الخلايا العضليه اللي تمزقت ، اذا تجددت تكون اقوى وتقدر تحرق دهون اكثر واكثر 💪🏼..

وقلنا الوجبه بعد الرياضه لازم ما تكون مليانه دهون زي الاكل المقلي او الفاست فود ولا تكون مليانه سكريات ، هالشيء له تأثير ضار للجسم ..

.

نجي لنقطة مهمه وهي الجدول الرياضي :

بعطيكم فكرة عامه وكل وحدة تسوي لها الجدول اللي يريحها ويناسبها : – قبل الرياضه لازم تسوين لجسمك تمارين تحميه وابحثي بيوتيوب ( warm up workout ) , بتلاقين تمارين كثيير وانتي اختاري منها الي يناسبك👌.. – امشي على السير شوي ( مدة نص ساعه ) – اختار جزء واحد بالجسم اعمل له تمارين ( مثلا يوم اختار الجزء العلوي من الجسم ويوم اختار الجزء السفلي و يوم اخليه لكامل الجسم وكذا) – انهي التمارين ، بعمل تمارين تهدئه للعضلات عشان ترتاح ويوصلها اكسجين✨ اسمها بيوتوب cooldown workout

– اهم نقطه اشربي ماء قبل الرياضه واحرصي انك تكونين ماكله وجبه غنيه بالبروتين قبل الرياضه بساعه او ساعتين .

– ضروري ما تسوين رياضة لنفس الجزء من جسمك يومياً ، فمثلا اذا عملنا تمارين لليدين والجزء العلوي من الجسم ما نسويها كل يوم ، نخليها مرة كل يومين او ٣ ايام عشان العضله ترتاح.

وعن نفسي اختار يوم او يومين بالاسبوع اسوي كارديو على معدة خاويه ، هالشيء يخلي معدل الايض والحرق يزيد وتعطي طاقه وسعادة ” مستحيل القهوة تسوي كذا😂✨💞”

فلسفة ديمز · يلا نتعلم شيء جديد · تطوير

كيف نتصرف مع ناس تغيروا علينا فجأة؟ 

وحدة من المتابعات ارسلت لي رسالة تقول فيها : انا كنت اعرف ناس وكانت علاقتنا حلوة، فجأة تغيرو و صارو يتصرفون معي بطريقة غريبة .. وش اسوي؟

اولا: طريقة التصرف تختلف حسب قرب او بعد الناس ، فمثلاً اذا كانوا من عائلتك فلازم تحافظين على علاقتك فيهم ، ليه؟ لانهم اهلك وقطع العلاقة يعني قطع صلة الرحم وهالشيء ما يرضي الله

– عن أنس بن مالك_ رضي الله عنه_ قال : قال رسول الله صلى الله عليه وسلم : ((من سرهُ أن يبسط له في رزقه ، ويُنسأ له في أثرة فليصل رحمه)) البخاري

يعني قطع صله الرحم معناة قطع الرزق!

و ضروري تحسنين بالعلاقة وانتبهي ما يطلع منك الا الطيب سواءا بالقول او بالفعل لانك اساسا تطلبين رضا الله عنك مو رضا الناس ..

وحطي ببالك شغله مهمه : ان العلاقات تتغذى وتقوى بالكلمة الطيبة ، بالهدايا حتى لو كانت بسيطة ، او بجلسة معهم ، فهذي نصيحتي لك : غذّي علاقتك بأهلك ..

طيب اذا كانوا هالناس : صديقات مثلا او زميلات بالعمل، اقترح ما تسألينهم عن سبب تغيرهم فجأة عليك ، وتريحين راسك ولا تركضين وراهم ، خلي علاقتكم تبدأ بالسلام  ومحصورة بالعمل و عامليهم بأخلاق رسولنا صلى الله عليه وسلم..

وريحي قلبك ولا تشيلين فيه شيء لان بكذا محد راح يتنكد الا انتي! فالمطلوب : المسامحة ، سامحيهم واعفي عنهم..

فيه مقوله جميلة سمعتها مرة :

الكراهيه والحقد مثل السم الذي يتناوله الشخص ويتمنى غيره ان يموت!

فإنتبهي من المشاعر السامة و اصفحي واعفي عنهم ..

يقول الشافعي :

لمّا عفوتُ و لم احقد على أحدٍ

أرحتُ نفسي من همّ العداواتِ

إنّي احيي عدوّي عند رؤيتهِ

أدفع الشر عني بالتحياتِ